డీ విటమిన్ బియ్యం.. పండిచటం ఎలా ?

రైతు చింతల వెంకటరెడ్డి
మట్టి సేద్యంలో చింతలకు పద్మశ్రీ అవార్డు
తాజగా విటమిన్ డీ తో కూడిన వరిధాన్యం ఉత్పత్తి 

ఇంతవరకు మనం డీ విటమిన్ క్యాప్సిల్స్, డీ విటమిన్ ఫుడ్ గురించి మాత్రమే విన్నాం. కానీ తాజాగా డీ విటమిన్ బియ్యం కూడా వచ్చాయి. ఇదేదో విదేశాల్లో జరిగిన అద్భుతం కాదు.. మన దేశంలో మన తెలంగాణలో ఓ రైతన్న అద్భుత ఆవిష్కరణ. తెలంగాణ రైతు శాస్త్రవేత్త చింతల వెంకటరెడ్డి మరో అద్భుతాన్ని ఆవిష్కరించారు. సేంద్రియ పద్ధతుల్లో సాగుచేసే బియ్యం, గోధుమల్లో డీ విటమిన్‌ గణనీయమైన మోతాదులో ఉండేలా వినూత్న ఫార్ములాను రూపొందించారు. సాధారణంగా బియ్యం, గోధుమల్లో విటమిన్‌ డీ అంతగా ఉండదు. అయితే వెంకటరెడ్డి ఫార్ములా ప్రకారం రూపొందించిన ద్రావణాలను పంటపై పిచికారీ చేస్తే బియ్యం, గోధుమల్లో విటమిన్‌ డీ గణనీయమైన మోతాదులో వస్తుందని ఆయన చెబుతున్నారు.

తన ఫార్ములాపై అంతర్జాతీయంగా పేటెంట్‌ కోసం గత ఏడాది దరఖాస్తు చేయగా, తాజాగా నోటిఫికేషన్‌ వెలువడింది. చింతల వెంకటరెడ్డి మేడ్చల్‌ మల్కాజిగిరి జిల్లాలోని అల్వాల్‌కు చెందిన ప్రముఖ ద్రాక్ష రైతు. రసాయనాలు వాడకుండా, జన్యుమార్పిడి వంటి ఖరీదైన సాంకేతికతలు వాడనవసరం లేకుండానే ధాన్యం, గోధుమ పంటల్లో ఎక్కువ మోతాదులో విటమిన్‌ డి వచ్చేలా వెంకటరెడ్డి విజయం సాధించారు. బియ్యంలో విటమిన్‌ డీ సాధించిన ఫార్ములాకు పేటెంట్‌ హక్కు పొందడానికి అంతర్జాతీయ మేధో హక్కుల సంస్థ(డబ్లు్యఐపీవో) తాజాగా గ్రీన్‌సిగ్నల్‌ ఇచ్చింది. పేటెంట్‌ కోఆపరేషన్‌ ట్రీటీ (పీసీటీ) ధ్రువీకరణ ఇచ్చింది. అతని ఫార్ములాపై 130 దేశాల పేటెంట్‌ కార్యాలయాల్లో దరఖాస్తు చేసుకొని జాతీయస్థాయి పేటెంట్‌ హక్కులు పొందడానికి అవకాశం ఏర్పడింది.

వరి సాగు సందర్భంగా ‘విటమిన్ ఏ’ను కలపడం, సూర్యరశ్మి దానికి తోడవడంతో ‘విటమిన్‌ డీ’తో కూడిన వరి ధాన్యం ఉత్పత్తి అయిందని చింతల వెంకటరెడ్డి చెబుతున్నారు. సీ విటమిన్‌¯తో కూడిన వరి, గోధుమలను ఉత్పత్తి చేయాలన్నా తన వద్ద అందుకు సంబంధించిన ఫార్ములా ఉందన్నారు. పోషకాలు, విటమిన్లు కలిగిన వరి, గోధుమలను పండించే ఫార్ములా తన వద్ద ఉందని, రైతులు వ్యక్తిగత అవసరాల కోసం కోరితే ఎలా పండించాలో చెప్తానని, వ్యాపార అవసరాల కోసమైతే తన వద్ద అనుమతి తీసుకోవాల్సి ఉంటుందని పేర్కొన్నారు.

తాను ఇప్పటివరకు పండించిన డీ విటమిన్‌ బియ్యాన్ని అనేకమంది తీసుకెళ్లారని, కరోనా కాలంలో ఈ బియ్యానికి పెద్ద ఎత్తున డిమాండ్‌ ఉందన్నారు. సూర్యరశ్మి అందక పట్టణ, నగరవాసులు విటమిన్‌ డీ లోపానికి గురవుతున్నారు. దీంతో అనేకమంది జబ్బుల బారిన పడుతున్నారని, డీ విటమిన్‌ లోపం తెలుసుకొని కొందరు మాత్రలు వాడుతున్నారని అన్నారు. మట్టి సేద్యంతో ప్రసిద్ధి పొందిన చింత వెంకట్ రెడ్డి గత ఏడాది పద్మశ్రీ పురస్కారం అందుకున్నారు. గతంలో ఆవిష్కరించిన ‘మట్టి సేద్యం’ఫార్ములాను దేశవ్యాప్తంగా సేంద్రియ/ప్రకృతి వ్యవసాయం చేస్తున్న రైతులు ఉపయోగించుకుంటూ లబ్ధి పొందుతున్నారు. ప్రభుత్వం కోరితే ఈ ఫార్ములా ఇవ్వడాని తాను సిద్ధంగా ఉన్నానన్నారు. ప్రభుత్వానికి ఆసక్తి లేకపోతే, బహుళజాతి కంపెనీలకు ఇస్తానని చెప్పారు.

https://telugu.samayam.com/telangana/news/hyderabad-farmer-wins-patent-for-d-vitamin-rice-production/articleshow/80891389.cms